Nepal Pilgrimage Song—Tibetan

༄༅། །བལ་ཡུལ་གནས་བསྐོར་འཁོར་བའི་གླུ་ཚེ་རིང་ཞབས་བྲོ་བཀྲ་ཤིས་སོ། །

ཨ་ཧོ་ཡེ།
བཀྲ་ཤིས་ཀྱི་སྣང་བ། །
དཀར་པོ་ཡི་ཚེས་འགྲོགས། །
བལ་ཡུལ་གྱི་མཐིལ་དུ། །
རྣལ་འབྱོར་ང་འབྱོར་བས། །
ངོ་མཚར་གྱི་ཡུལ་གྲུ། །
བཀོད་པ་ནི་ཁྱད་འཕགས། །
སངས་རྒྱས་ཀྱི་བྱིན་རླབས། །
ཆོས་སྐུ་ཡི་མཆོད་རྟེན། །
རྣམ་གསུམ་དེ་བཞུགས་པས། །
དགེ་མཚན་གྱི་གཟི་འབར། །
ས་གཞི་ལ་གཡང་ཆགས། །
བྱིན་རླབས་ཀྱི་ན་བུན། །
སྤྲིན་བཞིན་དུ་གཏིབ་ཅིང་། །
ཐུགས་རྗེ་ཡི་ཆར་རྒྱུན། །
སི་ལི་ལི་འབེབ་བྱུང་། །
འཇིག་རྟེན་གྱི་ལྷ་ཆེན། །
ནོར་གྱི་ནི་བདག་པོས། །
ཕྱ་གཡང་ནི་སྩོལ་འདུག །
སྐྱེས་པ་ནི་དཔའ་བོ། །
བཞིན་རས་ནི་དུང་དང་། །
བྱེ་རུ་ལྟར་སྣུམ་ཞིང་། །
མཛེས་པ་དང་བརྗིད་ཆགས། །
མོ་བཙུན་ནི་བཞིན་བཟང་། །
ལྷ་ཡུལ་གྱི་བུ་མོ། །
ས་འདི་རུ་འཕོས་འདྲ། །
ཨ་ཧོ་ཡེ།
བུ་ཆུང་གཞོན་ནུ་ཡི་ཚོགས་རྣམས། །
ལྷ་ཕྲུག་རྩེ་བ་དང་འདྲའོ། །
ལྷ་དམག་རུ་མཚོན་ནི་སྒྲེང་བ། །
དགྲ་ལ་ཆས་པ་དང་འདྲའོ། །
བཟོ་རིག་འཕྲུལ་བཟོས་ཀྱི་བཀོད་པ། །
སྙན་པའི་སྒྲ་དབྱངས་དེ་སྒྲོགས་སོ། །
ཕྱོགས་མཚམས་བྱིན་ཅན་གྱི་གནས་མཆོག །
དུ་མས་ཁོར་ཡུག་ཀུན་ཁེངས་ཤིང་། །
ཤེལ་དཀར་བརྩེགས་འདྲ་ཡི་ལྷུན་པོ། །
ཡན་ལག་བརྒྱད་ལྡན་གྱི་ཆུ་བོ། །
ཁྲུས་ཀྱི་རྫིང་བུ་ནི་མང་པོ། །
རྣམ་མང་བཟའ་བཏུང་གི་ཞིམ་མངར། །
འཇམ་མཉན་གོས་བཟང་གི་ལྷབ་ལྷུབ། །
དེ་འདྲའི་གནས་ཡུལ་གྱི་བཀོད་པ། །
མཐོང་བས་སེམས་པ་ནི་དགའ་འོ། །
ཨ་ཧོ་ཡེ།
གནས་བསྐོར་སོང་བ་ཡི་དགེ་རྩ། །
རྩ་བའི་བླ་མ་ལ་འབུལ་ན། །
ཐུགས་ཀྱི་དགྱེས་པ་ནི་མཛོད་ཅིག །
མ་རྒན་སེམས་ཅན་ལ་སྦྱིན་པས། །
ཐར་པའི་ལམ་མཆོག་ཏུ་ཕྱིན་ཤོག །
ཨ་ཧོ་ཡེ།
བཀྲ་ཤིས་ཀྱི་ཞབས་བྲོ་འཁོར་གཅིག་འཁོར་གཉིས་འཁོར་གསུམ་རྒྱབ་པས་བདེ་སྐྱིད་ཕུན་སུམ་ཚོགས་པར་ཤོག་ཅིག །
ཟླ་ ༡༢ ཚེས ་༥ ལའོ།། །།