Mañjuśrī Light Offering—Tibetan
༄༅། །འཕགས་པ་འཇམ་དཔལ་ལ་བརྟེན་པའི་མར་མེའི་མཆོད་ཆོག་ཡེ་ཤེས་སྒྲོན་མེ་ཞེས་བྱ་བ་བཞུགས་སོ། །
ན་མོ་མཉྫུ་ཤྲི་ཡེ།
མཁྱེན་གཉིས་ཡེ་ཤེས་སྣང་བ་ཡིས། །
འགྲོ་བའི་མི་ཤེས་མུན་སེལ་བ། །
འཇམ་དཔལ་རྡོ་རྗེར་གུས་བཏུད་ནས། །
མར་མེའི་མཆོད་ཆོག་ཉུང་ངུར་སྤེལ། །
དེ་ལ་རྒྱལ་བའི་དུས་ཆེན་སོགས་ལ་རྗེ་བཙུན་མཁྱེན་པའི་གཏེར་ཆེན་ལ་སྣང་གསལ་མར་མེའི་མཆོད་ཆོག་སྔགས་ལུགས་དང་འབྲེལ་བར་འབུལ་བར་སྤྲོ་ན། འཇམ་དཔལ་གྱི་རྣལ་འབྱོར་རྒྱས་བསྡུས་ཅི་རིགས་སྔོན་དུ་འགྲོ་བས། མར་མེའི་ཕྲེང་བ་རྣམས་ལ་བསང་ཆུ་འཐོར་ཞིང་། ཨ་མྲྀ་ཏ་ཀུཎྜ་ལཱིས་བགེགས་བསལ། །
ཨོཾ་ཨཱཿཧཱུྃ།
སྟོང་གསུམ་དབྱིངས་ཀྱི་ཀོང་བུ་རུ། །
སྲིད་གསུམ་ཡེ་ཤེས་མར་མེ་སྦར། །
རིགས་དྲུག་འཁོར་བའི་མུན་སེལ་ཞིང་། །
འོད་གསལ་སྣང་བ་རྒྱས་པར་གྱུར།
ཨོཾ་མ་ཧཱ་ཛྙཱ་ན་ཨཱ་ལོ་ཀེ་བཛྲ་སྥ་ར་ཎ་ཁཾ།
ཞེས་སྤེལ།
ཧཱུྃ། སྣོད་བཅུད་འཇིག་རྟེན་རབ་འབྱམས་ཀྱི། །
སྣང་བའི་དངོས་པོ་ཐམས་ཅད་ཀུན། །
ངོ་བོ་འོད་གསལ་གོས་དཀར་མོ། །
རྣམ་པ་སྣང་གསལ་རིན་ཆེན་ཕྲེང་། །
འོད་ཀྱི་བྱེ་བྲག་མཐའ་ཡས་པས། །
འཁོར་འདས་ཀུན་གྱི་མུན་པ་སེལ། །
ཡེ་ཤེས་སྣང་བ་ལམ་མེ་བ། །
འགྲོ་བའི་མར་མེ་ཡེ་ཤེས་སྒྲོན། །
གཟི་བརྗིད་ཆེན་པོ་མཆོད་པའི་སྤྲིན། །
འདོད་ཡོན་རྒྱ་མཚོའི་གཏེར་ཆེན་པོས། །
འཇམ་དཔལ་རྡོ་རྗེའི་དཀྱིལ་འཁོར་ལྷ། །
རབ་འབྱམས་སྒྱུ་འཕྲུལ་དྲྭ་བའི་ཚོགས།
འཁོར་དང་བཅས་པའི་སྤྱན་ལམ་དུ། །
འབུལ་བས་བདག་ཅག་འཁོར་བཅས་ཀྱིས། །
བཅས་དང་རང་བཞིན་སྡིག་ལྟུང་བཤགས། །
དམ་ཚིག་ཉམས་ཆགས་ཞི་བ་དང་། །
མི་མཐུན་འགལ་རྐྱེན་བར་ཆད་སོལ། །
ཚེ་བསོད་དཔལ་འབྱོར་འཕེལ་ཞིང་རྒྱས། །
ཆགས་ཐོགས་སྒྲིབ་གསུམ་སྤངས་པ་ཡིས། །
མཁྱེན་གཉིས་ཡེ་ཤེས་རྒྱས་པ་དང་། །
འགྲོ་བའི་གཏི་མུག་མུན་པ་སེལ། །
འཇམ་དཔལ་རྡོ་རྗེའི་གསང་གསུམ་དང་། །
དབྱེར་མེད་མངོན་པར་བྱང་ཆུབ་མཛོད། །
ཨོཾ་ཨཱཿཧཱུྃ་ཨཱརྱ་མཉྫུ་ཤྲཱི་ཛྙཱ་ན་ཨཱ་ལོ་ཀེ་སརྦ་པཱུ་ཛ་ས་མ་ཡ་ཧོཿ
ཞེས་བརྒྱ་རྩ་སོགས་དབུལ་ལ། བར་མཚམས་རྣམས་སུ།
བདག་ཅག་འཁོར་དང་བཅས་པའི་སྡིག་སྒྲིབ་ཉེས་ལྟུང་ཐམས་ཅད་ཤཱནྟིཾ་ཀུ་རུ་སྭཱ་ཧཱ།
མཁྱེན་གཉིས་ཡེ་ཤེས་ཀྱི་སྣང་བ་ཐམས་ཅད་པུཥྚིཾ་ཀུ་རུ་ཨོཾ།
ཞེས་འདོད་གསོལ་ཀྱང་སྦྱར། གྲངས་རྫོགས་པ་དང་། མར་མེའི་བསྐང་བ་ནི།
ཨོཾ་ཨ་ར་པ་ཙ་ན་དྷཱིཿ
ཞེས་ཛབ྄་དབྱངས་ལན་བདུན་ནམ་ཉེར་གཅིག་ཙམ་བྱ།
ཧཱུྃ། བསྐང་ངོ་སྒྲོན་མེས་ཐུགས་དམ་བསྐང་སོགས་ན་རཀ་དོང་སྤྲུགས་ཀྱི་མར་མེའི་བསྐང་ཆོག་ཁྲུས་བདུན་གྱི་སྔགས་ཚིག་བཅས་བྱ། མཐར།
འཇམ་དཔལ་རྡོ་རྗེའི་དཀྱིལ་འཁོར་གྱི་ལྷ་ཚོགས་ཐམས་ཅད་མཆོག་ཏུ་དགྱེས། །
ཐུགས་ཀ་ནས་ཡེ་ཤེས་ཀྱི་འོད་ཟེར་བསམ་གྱིས་མི་ཁྱབ་པ་བྱུང་།
མར་མེ་ལ་ཐིམ་དེ་ལས་འོད་ཟེར་མཁའ་ཁྱབ་ཏུ་འཕྲོས།
བདག་དང་སེམས་ཅན་ཐམས་ཅད་ཀྱི་རྟོག་སྒྲིབ་ཉམས་ཆགས་རྒྱུ་དང་བཅས་པ་སྦྱངས།
གསང་བ་གསུམ་གྱི་བྱིན་རླབས་དང་དངོས་གྲུབ་ཐམས་ཅད་ཐོབ།
སྤོབས་པའི་གཏེར་ཆེན་བརྒྱད་ཐོབ་ཅིང་། །
འོད་གསལ་གྱི་དགོངས་པ་མཁའ་ཁྱབ་ཏུ་ཤར་བར་གྱུར།
ཨོཾ་བཛྲ་ཛྙཱ་ན་དཱི་པེ་སིདྡྷི་སིདྡྷི་ཧཱུྃ། ཨ་ཨ་ཨཿ
ཞེས་དགོངས་པ་བསྐྱངས།
མཐར་མར་མེའི་སྨོན་ལམ་གདབ་པ་ནི། ཀུན་མཁྱེན་བླ་མ་འཇམ་དཔལ་དགྱེས་པས་མདོ་ནས་བཏུས་པའི་མར་མེའི་སྨོན་ལམ་དང་ཐུན་མོང་མ་ཡིན་པའི་མར་མེའི་སྨོན་ལམ་འདི་ཡང་གདབ་པར་བྱ་སྟེ།
ཧོཿབརྡལ་ཁྱབ་ཐིག་ལེ་ཆེན་པོའི་དཀྱིལ་འཁོར་དུ༔
རང་བཞིན་འོད་གསལ་རྡོ་རྗེ་སློབ་དཔོན་དང་༔
རིག་རྩལ་ལུ་གུ་རྒྱུད་ཀྱི་མཆེད་ལྕམ་རྣམས༔
བྱང་ཆུབ་སྙིང་པོའི་བར་དུ་མི་འབྲལ་ཤོག༔
ངེས་འབྱུང་ཆེན་པོས་འཁོར་བའི་འཁྲུལ་པ་མཐོང་༔
སྙིང་རྗེ་ཆེན་པོས་འགྲོ་ཀུན་ཕ་མར་རྟོགས༔
མོས་གུས་ཆེན་པོས་བླ་མའི་བྱིན་རླབས་ཞུགས༔
རྣལ་འབྱོར་ཆེན་པོའི་དམ་ཚིག་མཐར་ཕྱིན་ཤོག༔
ལྟ་བ་བྱར་མེད་གནས་ལུགས་མངོན་དུ་གྱུར༔
སྒོམ་པ་བློ་འདས་འོད་གསལ་ལྷུམས་སུ་ཞུགས༔
སྤྱོད་པ་རང་གྲོལ་ཁྱབ་བརྡལ་གཉུག་མའི་ངང་༔
སྤང་ཐོབ་བྲལ་བའི་འབྲས་བུ་རོ་གཅིག་ཤོག༔
རིག་གདངས་ཆོས་ཉིད་མངོན་སུམ་ལྷུག་པར་མཐོང་༔
རིག་རྩལ་ཉམས་ཀྱི་སྣང་བ་གོང་དུ་འཕེལ༔
རིག་པ་ཚད་ཕེབས་སྐུ་དང་ཡེ་ཤེས་རྫོགས༔
རིག་སྟོང་ཆོས་སྐུ་ཆེན་པོ་མངོན་གྱུར་ཤོག༔
གལ་ཏེ་ཚེ་འདིར་བརྟན་པ་མ་ཐོབ་ན༔
འཆི་འཕོའི་རྟོག་པ་ཆོས་སྐུའི་དབྱིངས་སུ་ཐིམ༔
ཆོས་ཉིད་རང་གདངས་ལོངས་སྤྱོད་རྫོགས་སྐུར་གྲོལ༔
སྲིད་པའི་འཁྲུལ་སྣང་སྤྲུལ་སྐུར་ལྷུན་རྫོགས་ཤོག །
གཞི་དབྱིངས་ཁྱད་ཆོས་དྲུག་ལྡན་མངོན་གྱུར་ནས༔
གཞི་སྣང་གཟུགས་ཀྱི་རྣམ་རོལ་མཐའ་ཀླས་པའི༔
ཁམས་གསུམ་འགྲོ་ཀུན་གཅིག་ཀྱང་མ་ལུས་པ༔
རང་བཞིན་གདོད་མའི་དབྱིངས་སུ་གྲོལ་བར་ཤོག༔
ཅེས་སྙིང་ཐག་པ་ནས་སྨོན་ལམ་གདབ་བོ། །
སླར་ཡང་ཡན་ལག་བདུན་པ་སྔོན་དུ་འགྲོ་བས་བཟང་སྤྱོད་སྨོན་ལམ་དང་ཀུན་མཁྱེན་ཆོས་ཀྱི་རྒྱལ་པོའི་གསུང་མཐའ་ཡས་ཐེག་པ་ཆེན་པོའི་ལམ་ཆེན་དུ་སོགས་ཀྱི་སྨོན་ལམ་དང་། འཇམ་མགོན་མ་ཧཱ་པཎྜི་ཏའི་གསུང་སྔ་འགྱུར་བསྟན་རྒྱས་སྨོན་ལམ་སོགས་དང་ཞལ་ནས་གསུངས་པའི་བཀྲ་ཤིས་ཀྱི་ཚིགས་སུ་བཅད་པ་སོགས་རྒྱ་ཆེར་བརྗོད་པས་དགེ་ལེགས་སུ་བྱའོ། །
འདི་ནི་རྣལ་འབྱོར་བླ་མེད་དང་འབྲེལ་བའི་མར་མེའི་མཆོད་ཆོག་ཡིན་ལ། མདོ་ལུགས་རྐྱང་པ་བྱེད་ན་ཀུན་མཁྱེན་བླ་མ་ཉིད་ཀྱི་མཆོད་ཆོག་རྒྱས་བསྡུས་ལ་མར་མེའི་སྨོན་ལམ་མདོ་ནས་བཏུས་པ་ཉིད་སྦྱར་བ་ལེགས་པ་ཡིན་ནོ། །
འདི་ལས་བྱུང་བའི་དགེ་ཚོགས་རིན་ཆེན་སྒྲོན། །
འབར་བས་སྲིད་གསུམ་མུན་པ་ཀུན་བསལ་ནས། །
ཇི་ལྟར་ཇི་སྙེད་ཡེ་ཤེས་མངོན་དུ་བརྙེས། །
འཇམ་དཔལ་མཁྱེན་པའི་གཏེར་ཆེན་འགྲུབ་གྱུར་ཅིག །
ཅེས་པའང་ཀཿཐོག་རྡོ་རྗེ་གདན་གྱི་རྒྱུད་སྡེའི་ལྷ་ཁང་ཐུབ་བསྟན་བཤད་སྒྲུབ་ནོར་བུའི་ལྷུན་པོར་བཞུགས་པའི་མཁན་ནང་དོན་རིག་པ་ཁྱད་པར་དུ་སྨྲ་བ་ཨོ་རྒྱན་བསྟན་འཕེལ་ནས་གསུང་ནན་ཆེན་པོས་བསྐུལ་བའི་ངོར། ༢འཇམ་དབྱངས་མཁྱེན་བརྩེའི་སྤྲུལ་མིང་འཛིན་པ་ཆོས་ཀྱི་བློ་གྲོས་པས་རང་བཟོས་མ་བསླད་པར་ཨཽཌྜི་ཡ་ནའི་སློབ་དཔོན་ཆེན་པོའི་དགོངས་པ་དང་མཐུན་པར་གྲོ་ཞུན་ཟླ་བའི་ཚེས་བཅུ་བཟང་པོར་སྦྱར་བའི་ཡི་གེ་པ་ནི་ཆབ་མདོ་སྐྱོ་མདའ་སྤྲུལ་སྐུ་འཇམ་དབྱངས་ཆོས་ཀྱི་ཉིན་བྱེད་ཀྱིས་བགྱིས་པ་སྟེ་འདིས་ཀྱང་རྒྱལ་བའི་བསྟན་པ་སྤྱི་དང་། ཁྱད་པར་སྔ་འགྱུར་རྡོ་རྗེ་ཐེག་པའི་ནང་རྒྱུད་སྡེ་གསུམ་གྱི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཐམས་ཅད་དུ་ཉིན་མོར་བྱེད་པའི་འོད་ལྟར་གསལ་ཞིང་དགེ་ལེགས་དར་རྒྱས་སུ་གྱུར་ཅིག། །།
