Lament to Sachen Kunga Nyingpo—Tibetan

༄༅། །བླ་མ་ས་སྐྱ་པར་གདུང་དབྱངས་མོས་གུས་ཀྱི་གཟེར་འདེབས་ཅེས་བྱ་བ།

ཨོཾ་སྭསྟི།
སྲིད་དང་ཞི་བའི་འདྲེན་པ། །
མཁས་གྲུབ་ཀུན་གྱི་གཙུག་རྒྱན། །
ཁྱབ་བདག་རྡོ་རྗེ་འཆང་དབང་། །
ས་ཆེན་ཀུན་དགའི་སྙིང་པོ། །
བྱང་སེམས་སྦྱིན་པ་དཔལ་ཞེས། །
འཕགས་མཆོག་སྤྱན་རས་གཟིགས་དངོས། །
བརྩེ་ཆེན་ལག་ན་པདྨོ། །
མཁྱེན་རབ་རྒྱ་མཚོ་ཆེ་བཞིན། །
འཇམ་པའི་དཔལ་དང་གཉིས་མེད། །
རྡོ་རྗེ་ཐེག་པའི་གསང་མཛོད། །
ཟབ་རྒྱས་ནོར་བུའི་གཏེར་འཆང་། །
སྐལ་ལྡན་གྲུབ་མཆོག་སར་འགོད། །
གསང་འཛིན་ལག་ན་རྡོ་རྗེ། །
སྐུ་གཅིག་དུ་མར་བསྒྱུར་ནས། །
དུས་གཅིག་ཉིད་ལ་འགྲོ་དོན། །
བསམ་མི་ཁྱབ་པར་མཛད་པའི། །
ངོ་མཚར་ཆོ་འཕྲུལ་འབྱམས་ཀླས། །
རིགས་གསུམ་སེམས་དཔའི་སྤྲུལ་པ། །
འཁོན་གདུང་དྲི་མ་མེད་པ། །
ཟླ་བྲལ་ཀུན་གྱི་སྤྱི་མེས། །
འཇམ་མགོན་ཐུགས་རྗེའི་གཏེར་ཆེན། །
བླ་མ་ས་སྐྱ་པ་ལ། །
གསོལ་བ་སྙིང་ནས་འདེབས་སོ། །
རྟག་ཏུ་ཐུགས་རྗེས་གཟིགས་ནས། །
གསང་གསུམ་བྱིན་བརླབས་སྩོལ་ཅིག །
བདག་དང་བདག་ལ་འབྲེལ་ཐོབ། །
བདེ་ཆེན་ཞིང་དུ་དྲོངས་ཤིག །
རིགས་དྲུག་འཁོར་བའི་སེམས་ཅན། །
སྡུག་བསྔལ་མཚོ་ལས་སྒྲོལ་ཅིག །
བསྟན་དང་བསྟན་འཛིན་དར་རྒྱས། །
བསྟན་ལ་གནོད་རྣམས་མིང་མེད། །
ཁྱོད་ཀྱིས་མཐུ་ཡིས་བཅོམ་ནས། །
འཇིག་རྟེན་བདེ་སྐྱིད་ཕུན་ཚོགས། །
ཉི་ཟླ་བཞིན་དུ་རྒྱས་པར། །
མགོན་པོས་བྱིན་གྱིས་བརླབ་མཛོད། །