Lament to Loter Wangpo—Tibetan

༄༅། །སྣང་བ་སྐྱོ་མུན་ནེ་བའི་ངང་བྲིས་པའི་གདུང་དབྱངས།

ཕ་བླ་མ་རྡོ་རྗེ་འཆང་བློ་གཏེར་དབང་པོ་ཁྱེད་མཁྱེན་ནོ། །
མི་ལས་ངན་བདག་ལ་ད་ལྟ་རང་ཐུགས་རྗེས་གཟིགས་ཤིག །
བུ་འཁྲུལ་རྟོག་ངན་པས་བསླད་གྱུར་ནས། །
རྗེ་ཁྱེད་ཀྱི་ཡེ་ཤེས་སྐུ་མ་མཇལ། །
དུས་ཐ་ན་རྨི་ལམ་ཙམ་དུའང་། །
མགོན་ཁྱོད་ཀྱི་ཞལ་མཐོང་མེད་པ་འདི། །
བདག་ལས་ངན་སྡིག་པ་ཆེ་བ་འདྲ། །
རྗེ་ཁྱེད་ལ་ཁ་ཞེ་མེད་པ་ཡི། །
སྙིང་དད་པ་མོས་གུས་གཏིང་ནས་ཡོད། །
ཁ་ཙམ་དུ་མིན་སྙམ་དྲན་གྱུར་ཀྱང་། །
རྗེའི་ཞལ་མ་བསྟན་དང་གསུང་མ་ཐོས་པ་འདི། །
མི་ངའི་རྒྱུད་དད་པ་གཏིང་ཚུགས་མེད་པ་འདྲ། །
ང་ལ་མི་ཡི་བླ་མ་མང་ཡོད་ཀྱང་། །
བཀའ་དྲིན་ཆེ་བ་རྣམ་པ་ལྔ། །
དེའི་ནང་གི་གཙུག་གི་རྒྱན་གཅིག་པུ། །
ཕ་བླ་མ་ཁྱེད་ལས་གཞན་ན་མེད། །
རྗེ་ཁྱེད་ཀྱི་རྣམ་ཐར་དྲན་ཙ་ན། །
བཟོད་རླག་མེད་པའི་མཆི་མ་གདུང་། །
མཚན་བརྗོད་ན་དད་པའི་ཡུས་ཀྱི་བསྣངས། །
ཚུལ་དེ་ལ་དགོངས་ནས་ཐུགས་རྗེས་གཟིགས། །
སློབ་བུ་ལས་ངན་གྱི་དབང་དུ་མ་གཏོང་ཤིག །
རྗེ་ཡི་གསང་གསུམ་གྱི་དམ་ཚིག་དང་འགལ་བ་ལ། །
དུས་རྒྱུན་དུ་སྙིང་ནས་འགྱོད་པས་བཤགས། །
དག་ཚང་གི་གནང་བ་སྩལ་དུ་གསོལ། །
དུས་རྟག་པ་རྒྱུན་དུ་སྙིང་དབུས་སུ། །
སྒོམ་ནས་གསོལ་བ་རྩེ་གཅིག་འདེབས། །
བདག་གི་རྒྱུད་བྱིན་གྱིས་རློབས་པར་མཛོད། །
ཉམས་རྟོགས་ཀྱི་རྩལ་ཆེན་སྦར་དུ་གསོལ། །
རྟེན་དཀྱིལ་འཁོར་བཞིའི་འགྲོས་བཞི་ཐིམ། །
དཔལ་སྐུ་བཞིའི་དབང་ཕྱུག་ཐོབ་པར་ཤོག །
ཕ་རྗེ་བཙུན་རྡོ་རྗེ་འཆང་དབང་མཁྱེན། །
རྗེ་ཁྱེད་དང་འབྲལ་མེད་བྱིན་གྱིས་རློབས། །

ཅེས་ས་བྱི་རྒྱལ་ཟླའི་ཚེས་ཉེར་བརྒྱད་སྣང་བ་སྐྱོ་མུན་ནེ་བའི་ངང་གདུང་དབྱངས་སུ་བྲིས་པའོ།། །།