Chimé Pakmé Nyingtik Fulfilment—Tibetan

༄༅། །འཆི་མེད་འཕགས་མ་སྙིང་ཏིག་གི་བསྐང་བ་རིན་ཆེན་ཕྲེང་མཛེས་ཞེས་བྱ་བ་བཞུགས་སོ། །

 

ན་མོ་གུ་རུ་ཨཱརྻ་ཏཱ་ར་ཡེ།

དེ་ལ་འཆི་མེད་འཕགས་མའི་དཀྱིལ་འཁོར་དུ་ཚོགས་ཀྱི་མཆོད་པ་སོགས་ཀྱི་སྐབས་སྐོང་བ་བྱ་བར་སྤྲོ་ན། ཕྱི་ནང་གསང་བའི་མཆོད་རྫས་ཅི་འབྱོར་པ་བཤམས་ལ། སྐོང་རྫས་ནམ་མཁའ་མཛོད་ཀྱི་སྔགས་རྒྱ་ལན་གསུམ་གྱིས་བྱིན་གྱིས་བརླབས་ཤིང༌།

ཕྱི་ནང་གསང་བའི་སྐོང་རྫས་རྣམས་དྭངས་ཤིང་ཐོགས་པ་མེད་པ་ལྷ་ཚོགས་རྣམས་དགྱེས་པ་བསྐྱེད་པའི་ནམ་མཁའ་མཛོད་ཀྱི་འཁོར་ལོའི་སྤྲིན་ཆེན་པོར་གྱུར།

ཨོཾ་བཛྲ་སྥ་ར་ཎ་ཁཾ་

གྱིས་རྒྱས་པར་སྤེལ།

 

ཧཱུྃ་ཧྲཱིཿ རང་བྱུང་ཀ་དག་གདོད་མའི་ཀློང༌། །

འཆི་མེད་བདེ་ལྡན་ཞིང་གི་བདག །

པདྨའི་རིགས་མཆོག་བཅོམ་ལྡན་འདས། །

ཚེ་དཔག་མེད་མགོན་ཐུགས་དམ་བསྐང༌། །

 

འཆི་བདག་བདུད་ཚོགས་དབྱིངས་སུ་གཞོམ། །

གསང་སྔགས་རིག་སྔགས་ཀུན་གྱི་རྗེ། །

རྒྱལ་བའི་གཙུག་ཏོར་ལས་བྱུང་མ། །

རྣམ་པར་རྒྱལ་མའི་ཐུགས་དམ་བསྐང༌། །

 

འཁོར་བ་ལས་སྒྲོལ་ཏཱ་རེ་མ། །

ཏུ་རེས་ན་བ་རྣམས་ལས་སྒྲོལ། །

རྒྱལ་བ་ཀུན་གྱི་ཡུམ་གྱུར་མ། །

རྗེ་བཙུན་འཕགས་མའི་ཐུགས་དམ་བསྐང༌། །

 

དཔལ་ཆེན་ཆེ་མཆོག་ཕྱག་རྒྱའི་སྐུ །

འཁོར་འདས་སྲིད་ཞིའི་ཁྱབ་བདག་ཆེ། །

འོད་གསལ་རྡོ་རྗེའི་གསང་མཛོད་འཛིན། །

ཤྲཱི་སེང་ཧའི་ཐུགས་དམ་བསྐང༌།

 

པཎ་གྲུབ་ལྔ་བརྒྱའི་གཙུག་རྒྱན་ཆེ། །

འཕོ་ཆེན་དྭངས་མའི་སྐུ་མཆོག་བརྙེས། །

ཐེག་མཆོག་བསྟན་པའི་ཤིང་རྟ་ཆེ། །

དྲི་མེད་བཤེས་གཉེན་ཐུགས་དམ་བསྐང༌།

 

རྩ་གསུམ་རྒྱ་མཚོའི་སྤྱི་གཟུགས་ཆེ། །

འཆི་མེད་རིག་འཛིན་རྡོ་རྗེའི་སྐུ །

འཁོར་བ་སྲིད་དུ་རྟག་བཞུགས་པ། །

པདྨ་སཾ་བྷའི་ཐུགས་དམ་བསྐང༌།

 

རྣམ་པར་སྣང་མཛད་ལོ་ཙཱ་ཆེ། །

ཡེ་ཤེས་སྤྱན་ལྡན་སྤྲུལ་པའི་སྐུ། །

མཁྱེན་རབ་འོད་ཟེར་ས་གསུམ་ཁྱབ། །

བཻ་རོ་ཙཱ་ནའི་ཐུགས་དམ་བསྐང༌།

 

མདོ་སྒྱུ་སེམས་གསུམ་བསྟན་པའི་བདག །

གསང་སྔགས་རྒྱ་མཚོའི་མཛོད་འཛིན་ཅིང༌། །

མཐུ་སྟོབས་ནུས་པ་ཟླ་མེད་པ། །

གནུབ་བན་ཆེན་པོའི་ཐུགས་དམ་བསྐང༌།

 

འཇམ་དཔལ་དབྱངས་ཀྱི་རྣམ་པར་འཕྲུལ། །

བཀའ་དྲིན་མཚུངས་མེད་ཆོས་ཀྱི་རྒྱལ། །

གངས་ལྗོངས་བསྟན་པའི་ཤིང་རྟ་འདྲེན།

ཁྲི་སྲོང་ལྡེའུ་བཙན་ཐུགས་དམ་བསྐང༌།

 

ཡང་དག་གྲུབ་པ་ཆེན་པོའི་སྐུ། །

རྫུ་འཕྲུལ་ཐོགས་མེད་ཉི་ཟེར་འཆིབ། །

ཐུགས་ཀྱི་རིག་འཛིན་གྲུབ་པའི་རྗེ། །

ནམ་མཁའི་སྙིང་པོའི་ཐུགས་དམ་བསྐང༌།

 

གུ་རུའི་ཐུགས་ཀྱི་གཟུངས་མའི་གཙོ། །

གསང་ཆེན་བཀའ་ཡི་སྡུད་པ་མོ། །

མི་བརྗེད་གཟུངས་ཐོབ་ཏིང་འཛིན་བརྙེས། །

ཡེ་ཤེས་མཚོ་རྒྱལ་ཐུགས་དམ་བསྐང༌།

 

བཀའ་བབ་བདུན་གྱི་མཛོད་འཆང་ཞིང༌། །

གཏེར་འབྱིན་མཁས་གྲུབ་ཀུན་གྱི་རྗེ། །

འོད་གསལ་སྤྲུལ་པའི་རྡོ་རྗེར་ཤར། །

མཁྱེན་བརྩེའི་དབང་པོའི་ཐུགས་དམ་བསྐང༌།

 

ལྷ་སྲས་དམ་འཛིན་རྣམ་པར་འཕྲུལ། །

ཟབ་གཏེར་རྒྱ་མཚོའི་འཁོར་ལོས་བསྒྱུར། །

སྙིགས་མའི་འགྲོ་འདུལ་རིག་པ་འཛིན། །

མཆོག་གྱུར་གླིང་པའི་ཐུགས་དམ་བསྐང༌།

 

བཀའ་གཏེར་རབ་འབྱམས་བསྟན་པའི་བདག །

གསང་ཆེན་རྒྱ་མཚོའི་བསྡུ་བ་པོ། །

གསང་བའི་བདག་པོ་རྡོ་རྗེ་ཆོས། །

པདྨ་གར་དབང་ཐུགས་དམ་བསྐང༌།

 

རིགས་རྣམས་ཀུན་གྱི་ཁྱབ་བདག་ཆེ། །

ཡེ་ཤེས་སྤྱི་གཟུགས་གདོད་མའི་མགོན། །

དྲན་པས་སྲིད་ཞིའི་འཇིགས་འཕྲོག་པ། །

འཁོར་ལོའི་མགོན་པོའི་ཐུགས་དམ་བསྐང༌།

 

གཞན་ཡང་རྩ་བརྒྱུད་བླ་མ་དང༌། །

ཡི་དམ་ཞི་ཁྲོ་རབ་འབྱམས་ལྷ། །

ཕྲིན་ལས་ཐོགས་མེད་མཁའ་འགྲོ་དང༌། །

ཆོས་སྐྱོང་དམ་ཅན་ཐུགས་དམ་བསྐང༌། །

 

ཧཱུྃ་ཧྲཱིཿ དཀྱིལ་འཁོར་གཙོ་མོ་བཅོམ་ལྡན་འདས། །

འཆི་བ་མེད་པའི་མཆོག་སྦྱིན་མ། །

སོ་སོར་རྟོགས་པའི་ཡེ་ཤེས་གཟུགས། །

འཕགས་མ་ཡབ་ཡུམ་ཐུགས་དམ་བསྐང༌། །

 

ཞེ་སྡང་རྣམ་ཤེས་རྣམ་པར་དག །

རྡོ་རྗེའི་རིགས་མཆོག་བཅོམ་ལྡན་མ། །

མི་བསྐྱོད་རྡོ་རྗེའི་ངོ་བོ་ཉིད། །

རྡོ་རྗེ་སྒྲོལ་མའི་ཐུགས་དམ་བསྐང༌།

 

སེར་སྣ་ཚོར་བ་རྣམ་པར་དག །

རིན་ཆེན་རིགས་མཆོག་བཅོམ་ལྡན་མ། །

རིན་ཆེན་འབྱུང་ལྡན་ངོ་བོ་ཉིད། །

རིན་ཆེན་སྒྲོལ་མའི་ཐུགས་དམ་བསྐང༌།

 

འདོད་ཆགས་འདུ་ཤེས་རྣམ་པར་དག །

པདྨའི་རིགས་མཆོག་བཅོམ་ལྡན་མ། །

སྣང་བ་མཐའ་ཡས་ངོ་བོ་ཉིད། །

པདྨའི་སྒྲོལ་མའི་ཐུགས་དམ་བསྐང༌།

 

ཕྲག་དོག་འདུ་བྱེད་རྣམ་པར་དག །

ལས་ཀྱི་རིགས་མཆོག་བཅོམ་ལྡན་མ། །

དོན་ཡོད་གྲུབ་པའི་ངོ་བོ་ཉིད། །

ལས་ཀྱི་སྒྲོལ་མའི་ཐུགས་དམ་བསྐང༌།

 

རྟག་པར་ལྟ་བ་རྣམ་པར་དག །

ཞི་བའི་ཕྲིན་ལས་མངའ་མཛད་ཅིང༌། །

དཀྱིལ་འཁོར་ཤར་གྱི་སྒོ་སྐྱོང་མ། །

ལྕགས་ཀྱུ་མ་ཡི་ཐུགས་དམ་བསྐང༌།

 

ཆད་པར་ལྟ་བ་རྣམ་པར་དག །

རྒྱས་པའི་ཕྲིན་ལས་མངའ་མཛད་ཅིང༌། །

དཀྱིལ་འཁོར་ལྷོ་ཡི་སྒོ་སྐྱོང་མ། །

ཞགས་པ་མ་ཡི་ཐུགས་དམ་བསྐང༌།

 

བདག་ཏུ་ལྟ་བ་རྣམ་པར་དག །

དབང་གི་ཕྲིན་ལས་མངའ་མཛད་ཅིང༌། །

དཀྱིལ་འཁོར་ནུབ་ཀྱི་སྒོ་སྐྱོང་མ། །

ལྕག་སྒྲོག་མ་ཡི་ཐུགས་དམ་བསྐང༌།

 

མཚན་མར་ལྟ་བ་རྣམ་པར་དག །

དྲག་པོའི་ཕྲིན་ལས་མངའ་མཛད་ཅིང༌། །

དཀྱིལ་འཁོར་བྱང་གི་སྒོ་སྐྱོང་མ། །

དྲིལ་བུ་མ་ཡི་ཐུགས་དམ་བསྐང༌།

 

དཀྱིལ་འཁོར་ཆེན་པོའི་ཕྱི་རིམ་དང༌། །

བར་མཚམས་སྟེང་འོག་ཐམས་ཅད་དུ། །

འཆི་མེད་རིག་འཛིན་དྲང་སྲོང་ཚོགས། །

ཚེ་ལྷ་བྱེ་བ་འབུམ་སྡེ་དང། །

ཆོས་སྐྱོང་ནོར་ལྷ་གཏེར་གྱི་བདག །

རབ་འབྱམས་སྒྱུ་འཕྲུལ་དྲྭ་བ་ཆེ། །

ཇི་སྙེད་བསམ་ཡས་སྤྲོ་ཞིང་སྡུད། །

འཕགས་མའི་ལྷ་ཚོགས་ཐུགས་དམ་བསྐང༌། །

 

ཧཱུྃ་ཧྲཱིཿ ཐུགས་དམ་བསྐང་བའི་དམ་རྫས་ནི། །

མཆོད་ཡོན་ཞབས་བསིལ་མེ་ཏོག་སྤོས། །

སྣང་གསལ་དྲི་ཆབ་ཞལ་ཟས་དང༌། །

རོལ་མོ་གཟུགས་སྒྲ་དྲི་རོ་རེག །

བཀྲ་ཤིས་རྫས་རྟགས་རྒྱལ་སྲིད་བདུན།

ཁང་བཟང་དཔག་བསམ་ཁྲུས་ཀྱི་རྫིང༌། །

སྐྱེད་ཚལ་གཏེར་བུམ་འདོད་འཇོའི་བ། །

རིན་ཆེན་འཕན་གདུགས་བླ་བྲེ་དང༌། །

རྔ་ཡབ་ལྡ་ལྡི་ཕྱེ་མ་འཕུར། །

ལྷ་རྫས་དར་གྱི་ན་བཟའ་དང༌། །

རིན་པོ་ཆེ་ཡི་རྒྱན་ཆ་མཛེས། །

ཉེ་བའི་རིན་ཆེན་རྣམ་པ་བདུན། །

སྣོད་བཅུད་རི་གླིང་བཀོད་པ་ཆེ། །

གླུ་དབྱངས་ཚིགས་སུ་བཅད་པའི་སྒྲ། །

བཟའ་བཅའ་བཏུང་བ་སྣ་ཚོགས་དང༌། །

ལྷ་དང་ལྷ་མོ་མང་པོ་ཡི། །

བྲོ་གར་འདུ་འཕྲོ་ཡིད་དུ་འོང༌། །

རྡོ་རྗེའི་རིག་མ་བཅུ་དྲུག་དང། །

སྨན་རཀ་གཏོར་མ་ཚོགས་མཆོད་སོགས། །

ཞིང་ཁམས་རབ་འབྱམས་དཔག་མེད་ན། །

མཆོད་རྫས་བསམ་ཡས་ལྷུན་གྲུབ་ཀུན། །

ཀུན་ཏུ་བཟང་པོའི་སྨོན་ལམ་དང༌། །

ནམ་མཁའ་མཛོད་ཀྱི་ཏིང་འཛིན་ལས། །

བྱུང་བའི་བདེ་སྟོང་རོལ་པའི་རྩལ། །

མཆོད་པའི་སྤྲིན་ཕུང་མཐའ་ཡས་པ། །

དཀྱིལ་འཁོར་ལྷ་ཚོགས་ཐམས་ཅད་ཀྱི། །

རྡོ་རྗེའི་དབང་པོས་དགྱེས་པར་རོལ།

ཁམས་གསུམ་སྣང་བ་མ་ལུས་ཀུན། །

རྡོ་རྗེའི་ལུས་ཀྱི་དཀྱིལ་འཁོར་ཆེ། །

འཆི་མེད་འཕགས་མའི་རྟེན་བརྟེན་པར། །

ལྷུན་གྱིས་གྲུབ་པ་ཆེན་པོར་རྫོགས། །

དེ་ལས་བྱུང་བའི་སྣང་བའི་དངོས། །

ཇི་སྙེད་མཆོད་པའི་སྤྲིན་ཕུང་ཆེ། །

ཟག་མེད་རང་སྣང་བདེ་ཆེན་སྤྲིན། །

དབྱིངས་ལས་བྱུང་ཞིང་དབྱིངས་ཀྱི་རྒྱན། །

གདོད་ནས་དག་པ་ཆེན་པོ་ཡི། །

གཉུག་མ་མི་ཤིགས་སྟོང་ཆེན་ཀློང༌། །

འོད་གསལ་སྒྱུ་འཕྲུལ་ཐིག་ལེ་ཆེ། །

ཡེ་ཤེས་སྣང་བ་ལམ་མེ་བ། །

མཆོད་བྱ་མཆོད་བྱེད་བྲལ་བས་བསྐང༌། །

 

ཐུགས་དམ་བསྐངས་པའི་བྱིན་རླབས་ཀྱིས། །

བཅས་དང་རང་བཞིན་ཉེས་པ་དང༌། །

རྩ་བ་ཡན་ལག་དམ་ཚིག་ལ། །

འགལ་འཁྲུལ་ནོངས་པ་ཅི་མཆིས་པ། །

དཀྱིལ་འཁོར་ལྷ་ཚོགས་སྤྱན་སྔ་རུ། །

གནོང་འགྱོད་དྲག་པོས་མཐོལ་ལོ་བཤགས། །

བདག་ལ་བརྩེ་བས་རབ་དགོངས་ཏེ། །

མི་སྒྲིབ་ཚངས་པའི་དངོས་གྲུབ་སྩོལ། །

 

སྐྱེ་འཆི་འཕོ་འགྱུར་སྤྲོས་པ་བྲལ། །

འཆི་བདུད་རྟོག་ཚོགས་དབྱིངས་སུ་ཞི། །

འཕགས་མ་ཡིད་བཞིན་འཁོར་ལོ་ཡི། །

རྡོ་རྗེ་གསུམ་མཆོག་འགྲུབ་པར་མཛོད། །

 

ཅེས་འཆི་མེད་འཕགས་མའི་ཐུགས་ཏིག་གི་བསྐང་བ་འདིའང་རིག་འཛིན་གྱི་བཙུན་པ་ཀུན་བཟང་འོད་གསལ་སྙིང་པོ་རྩལ་གྱིས་སྦྱར་བ་འདིས་ཀྱང༌། རང་གཞན་ཐམས་ཅད་འཆི་མེད་འཕགས་མའི་ཡེ་ཤེས་ཀྱི་སྐུ་མངོན་དུ་བྱེད་པའི་རྒྱུར་གྱུར་ཅིག །སརྦ་དཱ་མངྒ་ལཾ།། །།