Longchen Nyingtik Phowa—Tibetan
English | Deutsch | Français | བོད་ཡིག
༄༅། །ཀློང་སྙིང་འཕོ་བ་མ་བསྒོམས་སངས་རྒྱས་སྦྱང་ཚུལ།
ལྟ་བའི་ཀློང་ལ་ཕྱག་འཚལ་ལོ༔
འོད་གསལ་རྫོགས་པ་ཆེན་པོའི་ལམཿ
ཆོས་སྐུ་གཏད་མེད་རང་གྲོལ་ཏེཿ
བཙན་ས་ཟིན་པའི་གང་ཟག་ནིཿ
འཕོ་བྱ་འཕོ་བྱེད་ལས་འདས་ཀྱང་ཿ
སྤྲོས་ཅན་མྱ་ངན་འདའ་དོན་དུཿ
འཕོ་བ་མ་བསྒོམས་སངས་རྒྱས་བསྟནཿ
སྔོན་འགྲོ་སྐྱབས་སེམས་སྤྱི་ལྟར་བྱཿ
བདག་དོན་གཞན་དོན་གང་ལ་ཡང་ཿ
ཚད་མེད་རྣམ་བཞིས་ཟིན་པ་གཅེསཿ
ཅེས་གདམས་པ་བཞིན་རྣལ་འབྱོར་པ་ལམ་མཐར་མ་ཕྱིན་པར་འཆི་བ་ཐོག་བབ་ཏུ་བྱུང་ན་དག་པའི་ཞིང་དུ་མཚམས་སྦྱོར་བའི་གདམས་པ་འཕོ་བ་མ་བསྒོམས་སངས་རྒྱས་ད་ལྟ་ནས་སྦྱང་དགོས་པས་དེའི་ཚུལ་ནི།
ཐོག་མར་སྔོན་འགྲོ་བླ་མ་རྒྱང་འབོད་ནས་བཟུང་སྟེ།
བྱིན་རླབས་ཀྱི་འཇུག་སྒོ་བླ་མའི་རྣལ་འབྱོར་གྱི་མཇུག་ལམ་དབང་བླངས་མཐར།
བླ་མའི་ཐུགས་ཀ་ནས་སོགས།
དབྱེར་མེད་རོ་གཅིག་ཏུ་འདྲེས་པར་གྱུར།
ཅེས་ཐུགས་ཡིད་གཅིག་འདྲེས་གྲུབ་པ་དང་།
དེ་ལས་ལྡངས་ནས།
རྨོངས་པའི་འགྲོ་ལ་ཐུགས་རྗེ་ལྷག་པར་འཇུག །
སྡིག་པོ་ཆེ་ལ་རྗེས་སུ་ལྷག་པར་འཛིན། །
གདུལ་དཀའི་ཁམས་ལ་ཐབས་མཁས་ལྷག་པར་སྟོན། །
མཚུངས་མེད་བླ་མའི་ཞབས་ལ་ཕྱག་འཚལ་ལོ། །
རང་མགོ་མི་ཐོན་རོ་མགོར་ཅ་ཅོ་སྒྲོགས།།
ཉམས་སུ་མི་ལེན་བཤད་རྒྱངས་གདུགས་ལྟར་ཕུབ། །
བདག་དང་བདག་འདྲ་ཟོག་པོའི་རིགས་ཅན་རྣམས། །
སྒྲུབ་ལ་སྙིང་རུས་ནུས་པར་བྱིན་གྱིས་རློབས། །
ཞེས་གསོལ་བ་འདེབས་ཤིང་།
དངོས་གཞི་རང་ལུས་རྣལ་འབྱོར་མ༔
བྱི་སྒྲུབ་བླ་མའི་རྣལ་འབྱོར་ལྟར༔
ཞེས་པའི་ཏིང་ངེ་འཛིན་ལ་གཞོལ་བ་ནི།
ༀ་མ་ཧཱ་ཤཱ་ནྱ་ཏྭ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ་གིས་སྦྱངས།
ཨཱཿ རང་སྣང་ལྷུན་གྲུབ་དག་པ་རབ་འབྱམས་ཞིང་༔
བཀོད་པ་རབ་རྫོགས་བདེ་བ་ཅན་གྱི་དབུས༔
རང་ཉིད་གཞི་ལུས་རྡོ་རྗེ་རྣལ་འབྱོར་མ༔
ཞལ་གཅིག་ཕྱག་གཉིས་དམར་གསལ་གྲི་ཐོད་འཛིན༔
ཞབས་གཉིས་དོར་སྟབས་སྤྱན་གསུམ་ནམ་མཁར་གཟིགས༔
དེ་ཡི་ཁོང་དབུས་རྩ་དབུ་མ༔
སྦོམ་ཕྲ་མདའ་སྨྱུག་ཙམ་པ་ལ༔
སྟོང་སངས་འོད་ཀྱི་སྦུ་གུ་ཅན༔
ཡར་སྣ་ཚངས་བུག་གནས་སུ་ཧར༔
མར་སྣ་ལྟེ་བར་ཟུག་པ་ཡི༔
སྙིང་ཁ་ཚིགས་ཀྱིས་བཅད་པའི་སྟེང་༔
རླུང་གི་ཐིག་ལེ་ལྗང་སྐྱའི་དབུས༔
རིག་པ་ཧྲཱིཿཡིག་དམར་པོར་གསལ༔
སྤྱི་བོའི་ཁྲུ་གང་ཙམ་གྱི་སྟེང་༔
སངས་རྒྱས་སྣང་བ་མཐའ་ཡས་ནི༔
མཚན་དཔེ་རྫོགས་པའི་ཕུང་པོར་གསལ༔
མོས་གུས་དྲག་པོས་གསོལ་བ་གདབ༔
ཤེས་པ་གཞན་དུ་མ་ཡེངས་པ༔
རྩེ་གཅིག་འདུན་པའི་ཞུར་ལ་དྲངས༔
ཞེས་ཡིད་ཁྱེད་ཤེས་ཀྱི་དད་པས།
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ། །
མཆོད་དོ་སྐྱབས་སུ་མཆིའོ། །
ཅི་ནུས།
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་ལ་ཕྱག་འཚལ་ལོ།
མཆོད་དོ་སྐྱབས་སུ་མཆིའོ། །
ཅི་ནུས།
བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ།
མཆོད་དོ་སྐྱབས་སུ་མཆིའོ། །
ཅི་ནུས།
བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་མཐུ་ཆེན་ཐོབ་ལ་ཕྱག་འཚལ་ལོ། །
མཆོད་དོ་སྐྱབས་སུ་མཆིའོ། །
ཅི་རིགས་མཐར།
འཕོ་བའི་གསོལ་འདེབས་ནི།
ཨེ་མ་ཧོ༔
གནས་རང་སྣང་དོན་གྱི་འོག་མིན་ན༔
ཡིད་དད་བརྒྱའི་འཇའ་གུར་འཁྲིགས་པའི་ཀློང་༔
སྐྱབས་ཀུན་འདུས་རྩ་བའི་བླ་མ་ནི༔
སྐུ་ཐ་མལ་མ་ཡིན་དྭངས་མའི་ལུས༔
དཔལ་སངས་རྒྱས་སྣང་མཐའི་ངོ་བོར་བཞུགས༔
ཡིད་མོས་གུས་གདུང་བས་གསོལ་བ་འདེབས༔
ལམ་འཕོ་བ་འབྱོངས་པར་བྱིན་གྱིས་རློབས༔
གནས་འོག་མིན་བགྲོད་པར་བྱིན་གྱིས་རློབས༔
དབྱིངས་ཆོས་སྐུའི་རྒྱལ་ས་ཟིན་པར་ཤོག༔
ལན་གསུམ།
ཡང་ཡིད་མོས་གུས་མན་ཆད་ལན་གསུམ།
ཡང་དབྱིངས་ཆོས་སྐུའི་རྒྱལ་ས་ཟིན་པར་ཤོག༔ ལན་གསུམ་མཐར།
རྐན་གྱི་སྦུབས་ནས་ཧྲཱིཿཧྲཱིཿཞེས༔
ལྔ་ཚར་ཕྲུགས་གཅིག་བརྗོད་པ་དང་༔
ལྷན་གཅིག་སྟོད་གཅུམ་མགོ་བོ་སྒྲིམ༔
དེ་ཚེ་རིག་པ་ཧྲཱིཿདམར་པོ༔
ཤོག་སྐྱ་རླུང་གིས་བཏེག་པ་བཞིན༔
ཡར་ཡར་འགྲོ་བའི་ངང་དེ་ལ༔
ཕཊ྄ཿཅེས་དྲག་པོས་མདའ་ལྟར་འཕངས༔
འོད་དཔག་མེད་པའི་ཐུགས་ཀར་བསྟིམ༔
ཞེས་རང་གི་རིག་པ་སེམས་ཀྱི་ངོ་བོ་ཧྲཱིཿདང་འོད་ཀྱི་ཐིག་ལེ་དེ་ཉིད་སྐར་མདའ་འཕང་བ་བཞིན་སངས་རྒྱས་འོད་དཔག་མེད་ཀྱི་ཐུགས་ཀར་ཐིམ་པར་བསམ་ལ།
ཧྲཱིཿ
ལྔའམ་གསུམ་མཐར།
ཕཊཿ
ལྔའམ་གསུམ་བརྗོད། ཡང་ན་
ཧིཀཿ
ཉེར་གཅིག་ཙམ་བརྗོད།
ཡང་བཅོམ་ལྡན་འདས་སོགས་སྔར་ཇི་ལྟ་བ་བཞིན་བརྗོད་མཐར།
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ། །
མཆོད་དོ་སྐྱབས་སུ་མཆིའོ། །
གཏེར་སྟོན་ཉི་ཟླ་སངས་རྒྱས་ཀྱི་གཏེར་བྱོན་འཕོ་བ་འཇག་ཚུགས་མའི་གསོལ་འདེབས་ནི།
སངས་རྒྱས་འོད་དཔག་མེད་ལ་ཕྱག་འཚལ་ལོ༔
ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔
དྲིན་ཆེན་རྩ་བའི་བླ་མས་ཐུགས་རྗེས་ཟུངས༔
རྩ་བ་བརྒྱུད་པའི་བླ་མས་ལམ་སྣ་དྲོངས༔
ཟབ་ལམ་འཕོ་བ་འབྱོངས་པར་བྱིན་གྱིས་རློབས༔
མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས༔
བདག་སོགས་འདི་ནས་ཚེ་འཕོས་གྱུར་མ་ཐག༔
བདེ་བ་ཅན་དུ་སྐྱེ་བར་བྱིན་གྱིས་རློབས༔
ལན་གསུམ།
ཡང་བདེ་བ་ཅན་དུ་སྐྱེ་བར་བྱིན་གྱིས་རློབས༔ ཞེས་པ་ལན་གསུམ་མཐར།
ཧྲཱིཿ
ལྔའམ་གསུམ་མཐར།
ཕཊཿ
ལྔའམ་གསུམ་བརྗོད།
ཧིཀཿ
ཡང་བཅོམ་ལྡན་འདས་སོགས་སྔར་ལྟར་ལན་ཅི་རིགས་བརྗོད་མཐར།
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ། །
མཆོད་དོ་སྐྱབས་སུ་མཆིའོ། །
གནམ་ཆོས་འཕོ་བའི་གསོལ་འདེབས་ནི།
ཨེ་མ་ཧོ༔ ཤིན་ཏུ་ངོ་མཚར་འོད་དཔག་མེད་མགོན་དང་༔
ཐུགས་རྗེ་ཆེན་པོ་ཕྱག་རྡོར་མཐུ་ཆེན་ཐོབ༔
བདག་སོགས་རྩེ་གཅིག་ཡིད་ཀྱིས་གསོལ་བ་འདེབས༔
ཟབ་ལམ་འཕོ་བ་འབྱོངས་པར་བྱིན་གྱིས་རློབས༔
བདག་སོགས་ནམ་ཞིག་འཆི་བའི་དུས་བྱུང་ཚེ༔
རྣམ་ཤེས་བདེ་ཆེན་འཕོ་བར་བྱིན་གྱིས་རློབས༔
ལན་གསུམ་དང་།
ཡང་རྣམ་ཤེས་བདེ་ཆེན་འཕོ་བར་བྱིན་གྱིས་རློབས༔ ཞེས་པ་ལན་གསུམ་མཐར།
ཧྲཱིཿ
ལྔའམ་གསུམ་མཐར།
ཕཊཿ
ལྔའམ་གསུམ་བརྗོད།
ཧིཀཿ
དེ་ལྟར་ཡང་ཡང་འབད་པ་ཡིས༔
འབྱོངས་རྟགས་ཚངས་བུག་འཕར་བ་དང་༔
མགོ་ན་ཆུ་སེར་ཟིལ་པ་ཕྲོམ༔
འཇག་མ་དལ་གྱིས་ཚུགས་སོགས་འབྱུང་༔
ཞེས་པ་ལྟ་བུའི་རྟགས་མ་ཐོན་གྱི་བར་དུ་འབད།
ཐུན་མཇུག་བསྡུ་བ་ན།
དེ་ཚེ་འོད་དཔག་མེད་པའི་སྐུ༔
འོད་དུ་ཞུ་ནས་རང་ལ་བསྟིམ༔
རྐྱེན་དེས་སྐད་ཅིག་དྲན་རྫོགས་སུ༔
རང་ཡང་ཚེ་དཔག་མེད་དུ་གྱུར༔
ཨཱོྃ་གུ་རུ་ཨཱ་ཡུ་སིདྡྷི་ཧཱུྃ། ཨཱོྃ་ཨ་མཱ་ར་ཎི་ཛཱི་ཝན་ཏི་ཡེ་སྭཱ་ཧཱ༔
ཞེས་བརྒྱ་རྩ་དང་།
ༀ་ན་མོ་བྷ་ག་ཝ་ཏེ། ཨ་པ་རི་མི་ཏ་ཨཱ་ཡུརྫྙྰ་ན་སུ་བི་ནིཤྩི་ཏ་ཏེ་ཛྭ་རཱ་ཛཱ་ཡ། ཏ་ཐཱ་ག་ཏ་ཡ། ཨརྷ་ཏེ་སམྱཀྶཾ་བུདྡྷ་ཡ། ཏདྱ་ཐཱ། ༀ་པུཎྱེ་པུཎྱེ། མ་ཧཱ་པུཎྱེ། ཨ་པ་རི་མི་ཏ་པུཎྱེ། ཨ་པ་རི་མི་ཏ་པུཎྱེ། ཛྙཱ་ན་སཾ་བྷཱ་རོ་པ་ཙི་ཏེ། ༀ་སརྦ་སཾ་སྐཱ་ར་པ་རི་ཤུདྡྷ་དྷརྨཱ་ཏེ་ག་ག་ན་ས་མུཏྒ་ཏེ་སྭ་བྷཱ་ཝ་བི་ཤུདྡྷེ་མ་ཧཱ་ན་ཡ་པ་རི་ཝ་རེ་སྭཱ་ཧཱ།
ཞེས་ཚེ་གཟུངས་སོགས་འདོན་མཐར།
དགེ་བ་སྔོ་ཞིང་སྨོན་ལམ་གདབ༔
དེས་ནི་ཚེ་ལ་མི་གནོད་སྟེང་༔
རྟེན་འབྲེལ་བདེན་པས་ཚེ་གེགས་ཞི༔
གསང་སྔགས་ཐབས་ཀྱིས་ཆེ་བའི་ལམ༔
མ་བསྒོམས་སངས་རྒྱས་འཕོ་བའི་གནད༔
སྙིང་དང་མིག་ལས་གཅེས་པར་ཟུངས༔
དུས་མིན་འཆི་བའི་མཚན་མ་མཐོང་བ་དང་། །
དེ་ཡི་མོད་ལ་ཚེ་དཔག་མེད་མགོན་སྐུ། །
གསལ་བར་མཐོང་ནས་འཆི་བདག་དཔའ་བཅོམ་སྟེ། །
འཆི་མེད་རིག་འཛིན་མྱུར་དུ་འགྲུབ་པར་ཤོག །
ཚེ་རབས་ཀུན་ཏུ་ཚེ་དཔག་མེད་པ་ཡིས། །
ཐེག་མཆོག་བཤེས་གཉེན་དངོས་སུ་མཛད་པའི་མཐུས། །
རྒྱལ་བས་བསྔགས་པའི་ལམ་བཟང་དེ་ཉིད་ལས། །
སྐད་ཅིག་ཙམ་ཡང་ལྡོག་པར་མ་གྱུར་ཅིག །
དགེ་བ་འདི་ཡིས་བདག་དང་འགྲོ་བ་ཀུན། །
འཆི་བདག་ལ་སོགས་བདུད་བཞི་རྣམ་བཅོམ་ནས། །
སྐྱེ་རྒ་ན་འཆིའི་མཚོ་ཆེན་ལས་བརྒལ་བ། །
མགོན་པོ་ཚེ་མཐའ་ཡས་པ་ཐོབ་པར་ཤོག །
ཅེས་དང་།
དཔལ་ལྡན་རྩ་བའི་བླ་མ་རིན་པོ་ཆེ། །
སོགས་ནས།
ཐམས་ཅད་ཕྱམ་གཅིག་སངས་རྒྱས་ཐོབ་པར་ཤོག །
གཞན་ཡང་བདེ་བ་ཅན་དུ་སྐྱེ་བའི་སྨོན་ལམ་སོགས་གང་འོས་བྱའོ། །
བླ་མའི་རྣལ་འབྱོར་དང་འབྲེལ་བའི་ཟབ་ལམ་འཕོ་བའི་རྣལ་འབྱོར་འདི་ཉིད་ནུབ་རི་སྦས་ཡུལ་སྐྱིད་མོ་ལུང་གསེར་སྦྲང་དགོན་གྱི་སྒྲུབ་སྡེར་གསར་ཞུགས་རྣམས་ཀྱི་ཆེད་དུ་འདོན་བདེར་བྱེད་པ་པོ་རྡོ་གྲུབ་ཆེན་བཞི་པའོ། །དགེའོ། །
