Averting Negativity through Siṃhamukhā—Tibetan

༄༅། །སེང་གདོང་མའི་ཟློག་དམིགས།

དཔལ་ལྡན་རྡོ་རྗེ་ལྷ་མོ་ནི། །

དྲག་མོ་སེང་གེའི་གདོང་པ་ཅན། །

ཡེ་ཤེས་མེ་ཡི་འོད་ཟེར་འཕྲོ། །

སེང་གེའི་གདོང་ཅན་ལྷ་མོར་འདུད། །

ཨཿཀཿསཿམཿརཿཙཿཤཿདཿརཿསཿམཿརཿཡཿཕཊ།

ཅུང་ཟད་བསྙེན་མཐར།

མཁའ་འགྲོ་མ་སེང་གེའི་གདོང་པ་ཅན་ཁྱོད་ཀྱི་རིག་སྔགས་བཟླས་པའི་མཐུ་དང་ནུས་པ་ལ་བརྟེན་ནས་རྣལ་འབྱོར་པ་བདག་ཅག་དཔོན་སློབ་འཁོར་དང་བཅས་པ་རྣམ་ལ་སྡང་བར་བྱེད་པའི་དགྲ། གནོད་པར་བྱེད་པའི་བགེགས། བར་དུ་གཅོད་པའི་རྐྱེན། མདོར་ན་བཀྲ་མི་ཤིས་པའི་ཕྱོགས་རིས་ངན་པ་ཐམས་ཅད་ཕྱིར་བཟློག་པར་གྱུར་ཅིག །

ཁྲོ་མོ་འབར་བའི་ཚོགས་རྣམས་ཀྱིས། །

དགྲ་བགེགས་བྱད་མ་ཐམས་ཅད་ཀྱི། །

ལུས་ངག་ཐལ་བའི་རྡུལ་དུ་རློགས། །

རྣམ་ཤེས་ཆོས་ཀྱི་དབྱིངས་སུ་སྒྲོལ། །

ཁྱོད་ཀྱི་རིག་སྔགས་བཟླས་པའི་མཐུས། །

གནོད་བྱེད་མ་ལུས་ཞི་བ་དང༌། །

ཅི་བསམ་ཡིད་བཞིན་འགྲུབ་པ་དང༌། །

བཤད་སྒྲུབ་བསྟན་པ་རྒྱས་པར་མཛོད། །

ཀརྨ་པ་མི་བསྐྱོད་རྡོ་རྗེས་སོ། །དགེ་ལེགས་འཕེལ།། །།