Symbolism of the Vajra and Bell—Tibetan

༄༅། །རྡོར་དྲིལ་མཚོན་དོན།

འདིར་སྔགས་པ་རྣམས་ཀྱིས་རྟག་ཏུ་མི་འབྲལ་བར་བཅིངས་བར་བྱ་བའི་རྡོར་དྲིལ་ནི་སྔགས་ཀྱི་ཉམས་ལེན་གྱི་རིམ་པ་རྫོགས་པར་མཚོན་པས་དོན་ཆེན་པོ་ཅན་ཡིན་ཏེ། དེ་ལ་རྡོ་རྗེ་ནི་སྣང་ཕྱོགས་ཀྱི་ཆ་མཚོན་བྱེད་ཡིན་པས་ཐབས་བདེ་བ་ཆེན་པོའི་ཡེ་ཤེས་ཞེས་བྱ་བ་སྔགས་བླ་མེད་ཀྱི་ལམ་གནད་མཐར་ཐུག་པ་དེ་མཚོན་བྱེད། དེ་ཉིད་ཀྱི་ལྟོ་བ་ཟླུམ་པས་ཡེ་ཤེས་དེ་ཉིད་ཆོས་ཉིད་སྟོང་པ་ཉིད་ལ་གཉིས་སྣང་དང་བྲལ་བར་མཉམ་པར་བཞག་པའི་ཡེ་ཤེས་དེ་མཚོན་ཞིང་། ཡེ་ཤེས་དེ་ཉིད་ལམ་དུས་དང་འབྲས་དུས་ཀྱི་ཁྱད་པར་གྱི་དྲི་མ་ཐམས་ཅད་དང་བྲལ་བྱེད་དམ་བྲལ་པའི་བདག་ཉིད་ཅན་ཡིན་པ་དང་ནམ་དུའང་ཡེ་ཤེས་དེ་ཉིད་དྲི་མའི་ངོ་བོ་སྐྱེ་མི་སྲིད་པས། ཡེ་ཤེས་དེ་ཉིད་ཡེ་ཤེས་ལྔ་དང་ཡུལ་གྱི་ཆོས་ཉིད་ལྔ་མཚོན་པའི་ཡར་མར་གྱི་རྩེ་ལྔ། ཐུགས་རྗེ་ཆེན་པོས་འཁྱུད་པ་མཚོན་པས་ཆུ་སྲིན་གྱི་ཁ་དང་། ཡེ་ཤེས་དེ་ཉིད་ཀྱིས་གདུལ་བྱའི་རེ་བ་བསྐོང་བ་རྒྱུན་མི་ཆད་པའི་བརྡར་རིན་པོ་ཆེའི་ཕྲེང་བ་དང་ལྡན་པ་ཡིན་ལ། གཞན་ཡང་ཡེ་ཤེས་དེ་ཉིད་ཀྱི་རྩལ་དུ་རིགས་ལྔ་ཡབ་ཡུམ་སེམས་དཔའ་ཡབ་ཡུམ་དང་འགྲོ་འདུལ་གྱི་ཕྲིན་ལས་ཀྱི་མཛད་པ་རྣམས་མཚོན་པའི་བརྡར་ཡར་མར་གྱི་རྩེ་ལྔ་དང་པད་འདབ་བརྒྱད་རིན་པོ་ཆེའི་ཕྲེང་བས་མཛེས་པར་བྱས་པ་ཡིན་ནོ། །དྲིལ་བུ་ནི་ཆོས་ཉིད་སྟོང་བ་ཉིད་རྟོགས་པའི་ཤེས་རབ་མཚོན་བྱེད་ཡིན་པས་དབྱིངས་ཕྱུག་མའི་ཞལ་གྱིས་ཆོས་ཐམས་ཅད་ཀྱི་དེ་ཁོ་ན་ཉིད་བདེ་ཆེན་གྱི་ཡེ་ཤེས་དེ་ཉིད་ཀྱིས་མངོན་སུམ་གྱིས་གཟིགས་པ་མཚོན་པ་དང་། རྒྱལ་བའི་ཐུགས་རྟག་ཏུ་ཆོས་ཉིད་ལས་མི་གཡོ་བར་མཉམ་པར་བཞག་པས་རྡོ་རྗེའི་ཕྲེང་བ་དང་། ཡེ་ཤེས་དེ་ལ་ས་དང་ལམ་གྱི་ཡོན་ཏན་མཐའ་དག་རྫོགས་པས་བུམ་པ་དང་། ཡེ་ཤེས་དེ་ཉིད་ཐུགས་རྗེ་ཆེན་པོའི་བདག་ཉིད་མཚོན་བྱེད་ཆུ་སྲིན་གྱི་ཁ་དང་དེའི་རྩལ་ཕྲིན་ལས་རྒྱུན་མི་ཆད་པའི་དྲྭ་བ་དྲྭ་ཕྱེད། ཡེ་ཤེས་དེ་ཉིད་ཡུམ་ལྔ་དང་སེམས་མ་བརྒྱད་ལ་སོགས་པ་ལྷའི་རྣམ་པར་འཕྲུལ་བ་པད་འདབ་དང་མགོ་རྩེ་ལྔ་སོགས་དང་ལྡན་པ་ཤེས་པར་བྱ་དགོས་སོ། །མཚོན་དོན་གཞན་ཡང་ཡོད་པ་ནི་གཞིར་བཅའ་འོ། །དགེའོ། །