Sevenfold Authoritative Transmission (Kabab Dün)—Tibetan
༄༅། །བཀའ་བབ་བདུན།
རྫོགས་ཆེན་སྡེ་གསུམ་གྱི་ལུང་བསྟན་ལས། བཀའ་ནས་བཀའ་བརྒྱུད་བར་མ་ཆད༔ ཟབ་མོ་དངོས་དང་དགོངས་པའི་གཏེར༔ ཡང་གཏེར་རྗེས་སུ་དྲན་པའི་གཏེར༔ དག་སྣང་སྙན་དུ་བརྒྱུད་པ་ཡི༔ བཀའ་བབ་བདུན་གྱི་ཆུ་བོནི༔ མངའ་བདག་ཡབ་སྲས་སྐལ་པར་བབས༔ སྙིགས་དུས་བསྟན་པའི་བཙས་ཆེན་བྱེད༔ ཟབ་རྒྱས་ཉི་འོད་ལྷག་པར་བརྡལ༔ ཞེས་སོགས་གཏེར་ཁ་དུ་མ་ནས་འབྱུང་བ་ལྟར་སྔ་འགྱུར་བཀའ་གཏེར་དག་སྣང་གསུམ་ལས་ཕྱེ་བའི་ཟབ་ཆོས་ཀྱི་བཀའ་བབ་བདུན་དང་ལྡན་པར་གསུངས་པ་ལས་སྐབས་འདིར་ཀུན་གཟིགས་མཁྱེན་བརྩེའི་བཀའ་བབ་ལྟར་བཤད་ན་དགུང་གྲངས་བརྒྱད་སྟེང་གུ་རུ་རིན་པོ་ཆེ་ཡབ་ཡུམ་གྱིས་རྡོ་རྗེ་ཕུར་པའི་དཀྱིལ་འཁོར་དུ་དབང་བསྐུར་བས་བར་ཆད་ལས་རྒྱལ། དགུང་ལོ་བཅོ་ལྔ་པར་རྒྱ་གར་རྡོ་རྗེ་གདན་གྱི་ཀེའུ་ཚང་རིམ་པ་དགུ་པའི་ནང་ཕེབས་ཏེ་སློབ་དཔོན་འཇམ་དཔལ་བཤེས་གཉེན་གྱིས་མདོ་རྒྱུད་ཀྱི་གསང་མཛོད་གཏད། དགུང་གྲངས་བཅུ་དྲུག་སྟེང་ཟངས་མདོག་དཔལ་རིར་བྱོན་ནས་བཀའ་བབ་བདུན་འབྱུང་བའི་ལུང་བསྟན་བསྩལ་བ་ལྟར་བཀའ་བབ་དང་པོ་བཀའ་ཡི་བརྒྱུད་པ་ནི། གངས་ལྗོངས་སྒྲུབ་བརྒྱུད་ཤིང་རྟ་བརྒྱད་ཀྱི་དབང་གདམས་མན་ངག་མ་ལུས་པ་གསན་ནས་ཐུགས་དམ་ཉམས་སུ་བཞེས་པས་དེ་དག་གི་ལྷ་དང་བླ་མ་མཁའ་འགྲོ་རྣམས་ཀྱིས་རྗེས་སུ་བཟུང་། བྱིན་རླབས་ཉེ་བརྒྱུད་དུ་བྱུང་བ་དང་། གཉིས་པ་ས་གཏེར་ནི། ཐུགས་རྗེ་ཆེན་པོ་སེམས་ཉིད་ངལ་གསོ། བླ་མ་སྐུ་བཞིའི་སྒྲུབ་སྐོར། རྩ་གསུམ་སྒྱུ་འཕྲུལ་དྲྭ་བ། རྩ་གསུམ་བདེ་གཤེགས་འདུས་པ། རྩ་གསུམ་སྤྱི་འདུས་སོགས་དང་། མཆོག་གླིང་དང་ལྷན་རྒྱས་ཀྱིས་བླ་སྒྲུབ་སྐོར་གསུམ། སྙིང་ཐིག་སྐོར་བདུན་སོགས་དང་། གསུམ་པ་དེ་ལས་འཕྲོས་པ་ཡང་གཏེར་ནི། སངས་རྒྱས་བླ་མ་ནས་བརྩམས་གཏེར་ཁ་མི་འདྲ་བ་བཞི་བཅུ་ལྷག་ཙམ་གྱི་བཀའ་བབ་ཉེ་བརྒྱུད་བྱུང་བ་དང་། བཞི་པ་དགོངས་གཏེར་ནི། བླ་སྒྲུབ་སྐོར་གསུམ་གྱི་གསང་སྒྲུབ་མཚོ་སྐྱེས་རྡོ་རྗེ། འཕགས་མའི་སྙིང་ཐིག །གྲུབ་ཐོབ་ཐུགས་ཏིག་སྐོར། ལྔ་པ་དེ་ལས་འཕྲོས་པའི་རྗེས་དྲན་ནི། རྫོགས་པ་ཆེན་པོ་ལྕེ་བཙུན་སྙིང་ཐིག །རྗེས་དྲན་བཻ་རོའི་ཐུགས་ཏིག །སེང་གདོང་དཀར་མོའི་བཅུད་ལེན་སོགས་དང་། དྲུག་པ་དག་སྣང་ནི། ཚེ་ཡུམ་ཙཎྜ་ལི། |མི་ཏྲའི་སྙིང་ཐིག །ཀློང་སྙིང་བླ་སྒྲུབ་ཐིག་ལེའི་རྒྱ་ཅན། མཆོག་གླིང་འདས་རྗེས་སྐུ་གསུམ་རིགས་འདུས། བདུན་པ་སྙན་བརྒྱུད་ནི། གཤིན་རྗེ། རྟ་མགྲིན། ཡང་དག །ཆེ་མཆོག །ཕུར་པ། མ་མོའི་གནད་ཏིག་རྣམས་ད་ལྟ་ཐུན་མོང་གི་སྤྱོད་ཡུལ་དུ་བཞུགས་པ་རྣམས་ཡིན་ནོ། །མངྒ་ལས་སོ། །
