Advice in Three Sets of Three—Tibetan

༄༅། །གནད་ཀྱི་གདམས་ངག་གསུམ་ཚན་གསུམ་བཞུགས།

ན་མོ་བུདྡྷཱ་ཡ། སྡིག་པ་ཆུང་ཡང་དུག་བཞིན་བསྲུང་། །དཀའ་ཡང་དགེ་བ་འབད་པས་བསྒྲུབ། །རྩ་བ་བདག་འཛིན་རྣམ་རྟོག་གཞོམ། །འདི་གསུམ་ལྡན་ན་མཁས་པ་ལགས། །གཞན་གྱི་སྡིག་སྡུག་བདག་གིས་བླང་། །བདག་གི་དགེ་བདེ་གཞན་ལ་གཏང་། །སྟོང་ཉིད་སྙིང་རྗེ་རྟག་ཏུ་བསྒོམ། །འདི་གསུམ་ལྡན་ན་བྱང་སེམས་ལགས། །ཅིར་སྣང་སྒྱུ་མ་ལྷ་སྐུར་ཤེས། །དྲན་རིག་བདེ་གསལ་མི་རྟོག་པ། །བྱིན་རླབས་བླ་མའི་རྣལ་འབྱོར་བསྒོམ། །འདི་གསུམ་ལྡན་ན་སྔགས་པ་ལགས། །གནད་ཀྱི་གདམས་ངག་གསུམ་ཚན་གསུམ་འདི་ནི་ཆོས་རྗེ་ཐམས་ཅད་མཁྱེན་པ་བུ་སྟོན་རིན་པོ་ཆེས། དྭགས་པོ་རིན་ཆེན་ལ་གནང་བའི་གདམས་པ་ཡིན་ནོ།། །།